呢輪睇左幾套舊片, 都係無端端係有線「撞」到睇, 有d睇過(我記性差, 套戲睇過一次通常唔係太有印象), 有d未睇過:-

時光倒流七十年
雖然話到尾係大團圓結局, 但係要「監」生餓食超人, 兩個要死咗先可以係埋一齊, 好慘情!
p.s. 女主角戲中戲套衫勁靚, 有機會著就好喇!

我愛碧咸
姬拉麗莉演男仔頭都原來有說服力 (演技ok, 同埋可能佢無身材, 哈哈!) , 都係勵志片一套, 最好笑係姬拉麗莉阿媽懷疑個女係同性戀。我覺得編導太「好心」,女主角結局有得踢波, 攞埋獎學金去美國, 阿教練(雖然唔靚仔)仲做埋男朋友, 真係要乜有乜, 似乎太夢幻!!

大魚奇緣
添布頓作品,講父子情, 講故事既故事, 有時又係, 人生本來就係咁平凡咁悶, 加D想像力, 件事有趣, 無傷大雅, 俾我揀, 都係揀故事版, 而非生活版。
p.s. 今次同去戲1院睇個次, 都係miss左個開頭, 真係無緣!

芝加哥
睇完令人幾興奮的音樂劇電影, 雖然去到後面會覺得用個種華麗手法的歌舞段落有d重複(特別係法庭玩曬馬戲團個段), 但比起套《如果．愛》, 真係超班幾十倍!

天下無雙
唔知點解,幾鍾意呢套戲, 唔係因為王菲偉仔, 都唔係因為趙薇張震, 總之鍾意, 算係港產愛情片至愛頭五位。搞笑得黎唔算好白痴, 最鍾意係朱茵個角色, crossover西遊記, 掂呀! 

戀愛行星
林嘉欣+謝霆鋒, 愛情鬼片, 因為講跳舞, 所以睇埋落去, 竟然有yuri份!!! 小道消息仲話林嘉欣踢哂紫金冠的替身是congo喎!